Արգենտինայի հավաքականի ավագն ավարտեց իր բացառիկ՝ 21-ամյա միջազգային կարիերան՝ Բենինի դեմ ընկերական խաղում (3:0) գոլ խփելով և երկու գոլային փոխանցում կատարելով։

Այս վերջին հրաժեշտը, որը տեղի ունեցավ երեքշաբթի օրը՝ «Մոնումենտալ» մարզադաշտում՝ ավելի քան 85 000 երկրպագուների ներկայությամբ, ավելի շատ հիշեցնում էր ոչ թե սովորական ֆուտբոլային հանդիպում, այլ ազգային արարողություն՝ նվիրված ազգային հավաքականի կազմում Մեսիի ձեռքբերումներին։

Մինչ մայրաքաղաքի տեսարժան վայրերը լուսավորվում էին թիմի երկնագույն և սպիտակ գույներով, երկրպագուները ոգևորությամբ երգում էին Արգենտինայի ազգային հիմնը։ Հրավառությունը լուսավորեց մարզադաշտը։

Մեսիի ընտանիքը հպարտությամբ հետևում էր այդ պահերին տրիբունաներից՝ Արգենտինայի՝ աշխարհի առաջնություններում (1978, 1986 և 2022 թթ.) հաղթած թիմերի որոշ խաղացողների կողքին։

Խաղից մի քանի ժամ առաջ Մեսիի հայրենի քաղաքում՝ Ռոսարիոյում գտնվող Ազգային դրոշի հուշահամալիրում, փռվեց 10-րդ համարի հսկայական մարզաշապիկ՝ «Gracias» («Շնորհակալություն») գրությամբ։

Երբ թիմի ավտոբուսը դուրս եկավ նրա անունը կրող մարզաբազայից, Մեսսին չկարողացավ զսպել արցունքները՝ տեսնելով երթուղու երկայնքով շարված հազարավոր մարդկանց։

Երբ թիմերը դուրս եկան խաղադաշտ, Բենինի հավաքականի ավագը խաղից առաջ ձեռքսեղմման ժամանակ Մեսիին նվեր և նամակ հանձնեց. Մեսին ակնհայտորեն հուզված էր և դժվարությամբ էր խոսում։

«Մեսսի՛, Մեսսի՛» վանկարկումներ

Առանց գոլերի ավարտված առաջին խաղակեսից հետո Մեսին գոլային փոխանցում կատարեց Նիկոլաս Օտամենդիին, ով խփեց Արգենտինայի հաշիվը բացող գոլը։

Օտամենդին, ով ազգային հավաքականում 17 տարի անցկացրել էր Մեսիի կողք կողքի՝ մասնակցելով այդ թվում աշխարհի չորս առաջնության, Մեսիի նման ավարտում էր իր միջազգային կարիերան։

Այնուհետև Մեսին գոլային փոխանցում կատարեց երկրորդ գոլի համար, որի հեղինակը դարձավ Նիկո Պասը՝ ֆուտբոլիստ, ում դիտարկում են որպես Արգենտինայի հավաքականի 10-րդ համարի մարզաշապիկի հնարավոր ժառանգորդ։

Մեսին իրացրեց 11-մետրանոց հարվածը՝ հաշիվը դարձնելով 3։0 և գրանցելով իր 126-րդ գոլը միջազգային մակարդակում, մինչ տրիբունաներից կրկին հնչում էին «Մեսի՛, Մեսի՛» վանկարկումները։

Երբ հնչեց վերջին սուլիչը, թիմակիցները, մրցակիցներն ու մրցավարը հավաքվեցին Մեսիի շուրջ՝ գրկախառնվելու նրա հետ։ Այնուհետև դրոնների տպավորիչ շոուն լուսավորեց երկինքը՝ ի պատիվ Արգենտինայի հավաքականի կազմում Մեսիի փառահեղ կարիերայի ավարտի։

Մեսսին հրաժեշտ է տալիս ազգային հավաքականին՝ ունենալով հավաքականի կազմում անցկացրած խաղերի (208) և խփած գոլերի ռեկորդային ցուցանիշներ, և միջազգային ասպարեզում տարիներ շարունակ կրած հիասթափությունները վերածելով Աշխարհի գավաթի ու «Կոպա Ամերիկայի» հաղթանակներով լի պատմության։

Տարիներ շարունակ Արգենտինան հաջողություն էր ակնկալում Մեսիից։ Սակայն երեքշաբթի օրը նրանք այնտեղ էին՝ պարզապես նրան «շնորհակալություն» ասելու համար։