Ֆրանսիայի տարբեր քաղաքներում դպրոցներ են տարհանվել՝ պայթուցիկ սարքերի առկայության մասին սպառնալիքների պատճառով։ Բացի օդանավերի ուղղությամբ հնչեցված սպառնալիքներից, այժմ երկրում գրանցվել են նաև դպրոցներին ուղղված սպառնալիքներ։
Ֆրանսիայի կրթության նախարարության հայտարարության համաձայն՝ երեք առանձին կրթական շրջանների դպրոցներ թիրախավորվել են պայթուցիկ սարքերի մասին կեղծ ահազանգերով․ հետագայում հաստատվել է, որ այդ սպառնալիքներն իրականությանը չեն համապատասխանել։
Երեկ առավոտյան Մարսելի «Դոն Բոսկո» ավագ դպրոցում ռումբի առկայության մասին ստացված սպառնալիքից հետո՝ որպես նախազգուշական միջոց, տարհանվել են 700 աշակերտ և աշխատակից։
Մորե քաղաքում «Վիկտոր Բերար» ավագ դպրոց ուղարկված էլեկտրոնային նամակը ռումբի վերաբերյալ ահազանգի պատճառ է դարձել ինչպես այդ ուսումնական հաստատությունում, այնպես էլ մոտակայքում գտնվող «Յասինտ Կազո» միջնակարգ դպրոցում։
Լաոն քաղաքում գտնվող Տեխնոլոգիական համալսարանական ինստիտուտի (IUT) դեմ ռումբի առկայության մասին սպառնալիք է հնչել, ինչի հետևանքով հաստատությունից մարդիկ տարհանվել են։
Իռլանդիայի մայրաքաղաք Դուբլինում անցկացվող Եվրոպական քաղաքական համայնքի (ԵՔՀ) 9-րդ գագաթնաժողովի շրջանակներում լրագրողների հետ զրույցում Ֆրանսիայի նախագահ Էմանուել Մակրոնն ընդգծել է, որ դեռևս բավարար տեղեկություններ չկան՝ մայրցամաքում տեղի ունեցող՝ ռումբի առկայության մասին «կեղծ» սպառնալիքները որևէ կոնկրետ կողմի վերագրելու համար։
Մակրոնը հայտարարել էր, որ այս փուլում չեն կարող ասել՝ արդյոք օտարերկրյա ուժեր կան այս հաղորդումների հետևում։
