Իրանի Իսլամական հեղափոխության պահապանների կորպուսը հայտարարել է, որ թիրախավորել և ոչնչացրել է Բահրեյնում գտնվող ԱՄՆ վաղ նախազգուշացման ռադարը։

Իրանի Իսլամական հեղափոխության պահապանների կորպուսի հայտարարության մեջ ասվում է, որ «Հորմոզգան նահանգի Սիրիկ քաղաքում կապի աշտարակի վրա թշնամու ուժերի կողմից երեկ գիշեր իրականացված օդային հարվածի պատասխան՝ Իսլամական հեղափոխության պահապանների կորպուսի ռազմաօդային ուժերը հարվածել են Բահրեյնում գտնվող ԱՄՆ վաղ նախազգուշացման ռադարին»։

Հայտարարության մեջ հարձակումը որակվել է որպես լուրջ նախազգուշացում ԱՄՆ-ին՝ դադարեցնելու Իրանի օդային տարածքի խախտումները և նավթի մաքսանենգությունը Հորմուզի նեղուցում՝ հավելելով, որ Իրանը պատրաստ է հակահարված տալ, եթե այդ խախտումները կրկնվեն։

Իրանի Իսլամական հեղափոխության պահապանների կորպուսը զգուշացրել է, որ ԱՄՆ-ի ղեկավարությամբ գործող և այդ խախտումներին մասնակցող ընկերությունները կենթարկվեն ավելի խիստ պատժամիջոցների։

Ոչ ԱՄՆ զինված ուժերը, ոչ Բահրեյնը դեռևս չեն մեկնաբանել հարձակումը։

Իրանի պաշտոնական լրատվական գործակալությունը՝ IRNA-ն, ավելի վաղ գիշերը հայտարարել էր, որ «թշնամու ուժերը հարձակվել են Սիրիկ քաղաքի վրա»։