Թուրք և ղազախ ուսուցիչները համախմբվել են Ղազախստանի մայրաքաղաք Աստանայում անցկացված միջազգային վերապատրաստման ծրագրի շրջանակում։

Թուրքիայի Հանրապետության ազգային կրթության նախարարության և Աստանայի նահանգապետարանի կրթության վարչության համագործակցությամբ ու Թուրքիայի համագործակցության և համակարգման գործակալության (TİKA) աջակցությամբ կազմակերպված մեկշաբաթյա վերապատրաստման ծրագիրն ավարտվեց վկայականների հանձնման արարողությամբ։

Վերապատրաստման ծրագրի շրջանակում Ազգային կրթության նախարարության կողմից նշանակված վեց փորձագետներ Ղազախստանի տարբեր շրջաններում աշխատող 120 ուսուցչի համար տարբեր թեմաներով դասեր անցկացրին։

Ուսուցիչները հնարավորություն ունեցան տվյալ դասընթացների շրջանակում՝ տեսական գիտելիքների և գործնական աշխատանքների միջոցով ամրապնդելու ուսուցման ժամանակակից մոտեցումները։

Ծրագրի վերջին օրը «Ինտեգրված ուսուցման և դասավանդման մոդելների ներածություն» վերապատրաստմանը մասնակցած ուսուցիչները, կիրառելով ձեռք բերված գիտելիքներն ու հմտությունները, մշակեցին ուսումնական ինքնատիպ սցենարներ իրենց դասարանների համար, ինչպես նաև ներկայացրեցին իրենց աշխատանքները նախագծերի ցուցահանդեսում և հնարավորություն ունեցան միմյանց հետ փոխանակելու փորձն ու գաղափարները։

Հանդիսավոր արարողության ժամանակ, որի ընթացքում հանձնվեցին հավաստագրերը, TİKA-ի Աստանայի ծրագրի համակարգող Ֆուաթ Էրդողմուշը նշեց, որ կրթության ոլորտում համագործակցությունն էլ ավելի է ամրապնդում երկու երկրների միջև բարեկամության և եղբայրության կապերը։