Դոնալդ Թրամփը հայտարարել է, որ Իրանի դեմ ռազմական գործողությունից հետո «հաջորդը» կլինի Կուբան, և որ Կարիբյան ավազանի այս երկիրը շուտով կձախողվի։
Կիրակի օրը Վաշինգտոն մեկնող նախագահական ինքնաթիռում լրագրողների հետ զրույցում Թրամփն ասել է. «Հաջորդ երկիրը կլինի Կուբան»։
Կուբան անվանելով «խառնաշփոթ»՝ Թրամփը նշել է. «Նրանք ձախողված երկիր են, և նրանք հաջորդը կլինեն։ Նրանք շատ շուտով կձախողվեն, և մենք այնտեղ կլինենք՝ նրանց օգնելու համար։ Մենք այնտեղ կլինենք՝ կուբացի ամերիկացիներին օգնելու համար»։
Նա նաև ասել է, որ ռուսական նավթի հետ կապված «խնդիր չկա»
Երբ «Նյու Յորք Թայմս»-ի լրագրողին հարցրին, թե ռուսական նավթատար նավին թույլատրվելու է հասնել Կուբա, Թրամփը պատասխանեց, որ դրա հետ կապված «խնդիր չկա»։
«Մենք դեմ չենք, որ ինչ-որ մեկը նավթով լի նավ վերցնի, քանի որ նրան անհրաժեշտ է գոյատևել։ Եթե որևէ երկիր ցանկանում է հենց հիմա նավթ ուղարկել Կուբա, անկախ նրանից՝ դա Ռուսաստանն է, թե ոչ, ես ասացի, որ ինձ համար ընդունելի է», - ասաց Թրամփը։
Այն մասին, թե արդյոք դա օգուտ կբերի Ռուսաստանի նախագահ Վլադիմիր Պուտինին, ԱՄՆ նախագահը պատասխանեց, որ ոչ։
Թրամփը հավելել է. «(Պուտինը) կորցնում է նավթի մեկ նավ։ Այսքանը։ Դա խնդիր չէ։ Եթե նա ուզում է դա անել, և այլ երկրներ էլ ուզում են դա անել, դա ինձ այդքան էլ չի անհանգստացնում։ Դա ազդեցություն չի ունենա. Կուբան վերջացած է։ Նրանք ունեն վատ ռեժիմ։ Նրանք ունեն շատ վատ և կոռումպացված կառավարություն, և կարևոր չէ՝ նրանք կստանան նավթի մեկ նավ, թե ոչ։ Ես կնախընտրեի, որ նավթը գա, լինի դա Ռուսաստանից, թե որևէ այլ երկրից, քանի որ մարդկանց անհրաժեշտ է ջեռուցում, սառեցում և այլ բաներ»։
