ԱՄԷ-ում գործող Flydubai ավիաընկերության Դուբայից Թել Ավիվ թռիչք կատարող ուղևորատար ինքնաթիռը հայտնել է «ռազմական արտակարգ իրավիճակի և ինքնաթիռի առևանգման» մասին։

Իսրայելական Channel 12 հեռուստաալիքի հաղորդմամբ՝ Դուբայից թռիչք կատարող ինքնաթիռը Հորդանանի օդային տարածքի վրայով թռչելիս նախ ուղարկել է «7700» կոդը, որը վկայում է ընդհանուր արտակարգ իրավիճակի մասին, իսկ կարճ ժամանակ անց՝ «7500» կոդը, որը վկայում է ինքնաթիռի առևանգման մասին։

Հաղորդագրությունում նշվում է, որ ազդանշաններից հետո Իսրայելի ռազմաօդային ուժերի կործանիչները բարձրացել են ուղևորատար ինքնաթիռի ուղղությամբ։ Ինքնաթիռը, որը, ըստ որոշ տեղեկությունների, տեղափոխում էր մոտ 100 իսրայելցի քաղաքացի, որոշ ժամանակ պտտվել է Հորդանանի օդային տարածքում, նախքան Սաուդյան Արաբիա ուղղությունը փոխելը։

Իշխանությունները հայտարարել են, որ ինքնաթիռին թույլ չեն տվել վայրէջք կատարել Իսրայելում, և որ այս պահին նրանք չեն կարողացել կապ հաստատել ինքնաթիռի հետ։