Իռլանդիան 2027 թվականին ևս չի մասնակցի «Եվրատեսիլ»-ին։ Հայտարարություն․ Իռլանդիան, որը չէր մասնակցել «Եվրատեսիլ» երգի 2026 թվականի մրցույթին՝ Իսրայելի մասնակցության պատճառով, հայտարարել է, որ հաջորդ տարի ևս չի մասնակցի մրցույթին՝ որպես պատճառ նշելով Գազայում տեղի ունեցող իրադարձությունները։
Իռլանդիայի հանրային հեռարձակող RTÉ-ի տարածած գրավոր հայտարարության մեջ նշվել է, որ մրցույթին մասնակցելու վերաբերյալ դիրքորոշումը գալիք տարվա համար մնում է անփոփոխ։
Հայտարարության մեջ ասվում էր. «RTE-ն կարծում է, որ Իռլանդիայի մասնակցությունը մրցույթին չի կարող արդարացվել՝ հաշվի առնելով Գազայում մարդկային կյանքերի շարունակվող կորուստները, որոնք սարսափելի չափերի են հասել, ինչպես նաև հումանիտար ճգնաժամը, որը շարունակում է վտանգի տակ դնել բազմաթիվ խաղաղ բնակիչների կյանքը»։
Հայտարարության մեջ RTE-ն նաև խոր մտահոգություն է հայտնել Գազա միջազգային լրագրողների մուտքի շարունակական խոչընդոտման կապակցությամբ։
Անցյալ տարի մի խումբ երկրներ, այդ թվում՝ Իռլանդիան, որոշել էին չմասնակցել մրցույթին՝ «Եվրատեսիլի» մասնակիցների թվում Իսրայելի ընդգրկման պատճառով։
Իսրայելը, որը 2023 թվականից ի վեր Գազայում ցեղասպանություն է իրականացնում, և՛ 2025, և՛ 2026 թվականներին մրցավազքում հաղթելու եզրագծին էր, սակայն երկու անգամն էլ զբաղեցրեց երկրորդ տեղը։
Նիդերլանդների հեռարձակողը հայտարարեց, որ հակամարտություններում ներգրավված երկրներին բացառելը «բավարար» չէր՝ հավելելով, որ Գազայի շուրջ առկա պառակտումների պատճառով «Եվրատեսիլն» այլևս չի կարող չեզոք համարվել։
1955 թվականին առաջին անգամ անցկացվելուց ի վեր՝ «Եվրատեսիլ» երգի մրցույթը դարձել է մայրցամաքի փոփ-երաժշտության գլխավոր հարթակը։
Մրցույթը համաշխարհային ճանաչում բերեց շվեդական լեգենդար ABBA խմբին և նպաստեց այնպիսի արտիստների հաջողությանը, ինչպիսիք են Սելին Դիոնը, Քլիֆ Ռիչարդը և Օլիվիա Նյուտոն-Ջոնը։
Այն դիտել է 131 միլիոն հանդիսատես (նախորդ տարվա համեմատ՝ 35 միլիոնով պակաս) այն բանից հետո, երբ հինգ երկիր բոյկոտեց 2026 թվականի միջոցառումը՝ Իսրայելի մասնակցության պատճառով։
Նիդերլանդները, Իսլանդիան, Իսպանիան, Իռլանդիան և Սլովենիան հրաժարվեցին մասնակցել 2026 թվականի մրցույթին։ Իսպանիան, Իռլանդիան և Սլովենիան նույնիսկ չհեռարձակեցին հաղորդումը։
Հաջորդ տարվա միջոցառումը տեղի կունենա մայիսի 15-ին Սև ծովի ափին գտնվող բուլղարական Բուրգաս քաղաքում։
