ԱՄՆ նախագահ Դոնալդ Թրամփը պատրաստակամություն է հայտնել հաջորդ ամիս Չինաստանում հանդիպել Ռուսաստանի նախագահ Վլադիմիր Պուտինի և Չինաստանի նախագահ Սի Ծինփինի հետ։ Թրամփը նշել է, որ նման եռակողմ գագաթնաժողովի ուշադրության կենտրոնում, առաջին հերթին, կլինի միջուկային զինաթափումը՝ հավելելով, որ օրակարգում կարող է ընդգրկվել նաև Ուկրաինայում ընթացող պատերազմը։

Լրագրողների հետ զրույցում Թրամփն ասել է. «Ես կմասնակցեի այս գագաթնաժողովին, բայց ոչ թե Ուկրաինայի համար, քանի որ, անկեղծ ասած, Ռուսաստանը Ուկրաինայի հետ կապված խնդիր չի ստեղծում։ Նրանք, ըստ էության, ոչինչ էլ չեն անում»։ Նա հավելել է, որ պատրաստ է անել «իր ուժերի սահմաններում ամեն ինչ»՝ պատերազմին վերջ դնելու համար։

Պաշտպանելով թե՛ Մոսկվայի հետ դիզվառելիքի վերաբերյալ վերջերս կնքված գործարքը, թե՛ ԱՄՆ Կոնգրեսի սահմանած պատժամիջոցներից բացառություն տրամադրելու որոշումը՝ Թրամփը կոշտ անձնական դիտողություն արեց Ուկրաինայի նախագահ Վլադիմիր Զելենսկիի հասցեին. «Զելենսկին չգիտի, թե ինչի մասին է խոսում... Անկեղծ ասած, կարծում եմ՝ ժամանակն է, որ Ուկրաինայի անունից բանակցելու գործը հանձնվի մեկ ուրիշին»։

Կրեմլը հաստատել է, որ խորհրդակցություններ են ընթանում նոյեմբերի 18–19-ին Շենժենում կայանալիք Ասիական-խաղաղօվկիանոսյան տնտեսական համագործակցության (ԱԽՏՀ) գագաթնաժողովի շրջանակներում հնարավոր հանդիպման վերաբերյալ, սակայն մամուլի քարտուղար Դմիտրի Պեսկովը նշել է, որ պաշտոնական օրակարգ դեռևս սահմանված չէ։

ԱՄՆ-ը սառեցնում է զենքի մատակարարումները

Ուկրաինայի արտաքին գործերի նախարար Անդրիյ Սիբիհան կտրականապես մերժեց եռակողմ բանակցությունները, որոնցում Կիևը ներգրավված չէ՝ նշելով, որ նման ձևաչափը միայն կքաջալերի Մոսկվային։

ԱՄՆ Կոնգրեսի պատվիրակության հետ հանդիպմանը Զելենսկին ընդգծեց, որ Վաշինգտոնի վերջին որոշումները՝ այդ թվում զենքի մատակարարումների դադարեցումը և հետախուզական տվյալների փոխանակման սահմանափակումը, այնպիսի քայլեր են, որոնք «դժվար է բացատրել ընկերների միջև»։

Զելենսկին հայտարարեց, որ ուկրաինական ուժերը գործառնական սահմանափակումների են բախվում «Starshield» արբանյակային համակարգի օգտագործման հարցում, որը կենսական նշանակություն ունի անօդաչու թռչող սարքերի դեմ պաշտպանության համար։ Նա նաև նշեց, որ անցած շաբաթ երեք դեպքով նրանք չեն ստացել այն սովորական նախազգուշացումները, որոնք պետք է ստանային գործընկերներից՝ ռուսական հարձակումներից առաջ։

Զելենսկին հավելեց, որ հրթիռների կարևոր փաթեթը դեռ չի առաքվել, քանի որ այն սպասում է ԱՄՆ պաշտպանության նախարար Փիթ Հեգսեթի ստորագրությանը։

Զելենսկին հայտարարեց. «Այս ամենը վկայում է այն մասին, որ քաղաքական որոշում է կայացվել՝ դանդաղեցնելու մեզ տրամադրվող աջակցությունը»։

Ուկրաինայի ղեկավարը նաև առաջարկել է 30 օրով դադարեցնել հարձակումները ռուսական նավթավերամշակման գործարանների վրա՝ պայմանով, որ Վաշինգտոնը տրամադրի «Patriot» տիպի հրթիռներ։ Այս զարգացումը հաստատում է Նորվեգիայում սպասվող հանդիպումների վերաբերյալ ակնկալիքները․ խոսքը Սթիվ Ուիթքոֆի և Ջարեդ Քուշների հետ հանդիպումների մասին է, ովքեր հանդես են գալիս որպես ԱՄՆ նախագահի բանագնացներ։