Թուրքիայում ԱՄՆ դեսպան և Սիրիայի հարցերով հատուկ ներկայացուցիչ Թոմ Բարաքը հայտարարել է, որ Վաշինգտոնի և Անկարայի միջև Թուրքիայի կողմից ռուսական S-400 հակաօդային պաշտպանության համակարգի ձեռքբերման շուրջ ծագած վեճը «կկարգավորվի»։

Երկուշաբթի օրը Նյու Յորքում՝ «Թուրքական տան» (Turkish House) դիմաց լրագրողների հետ զրույցում Բարաքը հայտարարեց, որ ամերիկյան և թուրքական խմբերն «անխոնջ» աշխատում են երկկողմ և տարածաշրջանային խնդիրների լուծման ուղղությամբ։

«Թուրքիայի և Միացյալ Նահանգների միջև հարաբերություններն ավելի սերտ են, քան երբևէ», - ասել է Բարաքը՝ հավելելով, որ կողմերը մշտական ​​երկխոսության մեջ են։

Անդրադառնալով S-400-ի խնդրին՝ Բարաքը նշեց, որ վեճը բխում է ԱՄՆ օրենսդրությունից՝ մասնավորապես «Պատժամիջոցների միջոցով Ամերիկայի հակառակորդներին հակազդելու մասին» օրենքից (CAATSA), ինչպես նաև S-400 համակարգի շահագործման կարգավիճակին և սեփականությանը վերաբերող պահանջներից։

Նշելով, որ այդ ուղղությամբ աշխատանքներ են տարվում՝ Բարաքը խնդիրը բնութագրեց ոչ թե որպես «կրիտիկական հարց», այլ որպես «հարաբերությունների խնդիր»։

«Դրական արդյունք»

Բարաքը նաև ուշադրություն հրավիրեց Թուրքիայի պաշտպանական արդյունաբերության վրա՝ նշելով, որ երկիրն ունի «S-400-ից անկախ հզոր պաշտպանական արդյունաբերություն»։

Ընդգծելով ԱՄՆ-ի և Թուրքիայի հարաբերությունների ավելի լայն շրջանակը՝ Բարաքը հավելեց, որ տարբեր երկրներ տարբեր տեսակետներ ունեն այն հարցի վերաբերյալ, թե ինչպես պետք է լուծվի խնդիրը։

Լավատեսություն հայտնելով երկկողմ հարաբերությունների վերաբերյալ՝ Թոմ Բարաքը նշեց, որ երկու երկրները պետք է որոշեն, թե ինչը կհանգեցնի «դրական արդյունքի»։

Բարաքը ԱՄՆ նախագահ Թրամփի և նախագահ Ռեջեփ Թայիփ Էրդողանի միջև հարաբերությունները բնութագրեց որպես «շատ ամուր և փոխադարձ հարգանքի վրա հիմնված»։

Բարաքն ավելի վաղ հայտնել էր, որ գագաթնաժողովի շրջանակում նախատեսվում է Էրդողանի և Թրամփի հանդիպումը։