Տեխնոլոգիական ոլորտի միլիարդատեր Իլոն Մասկը համանախագահելու է Պենտագոնի՝ պատերազմի վարման ապագա եղանակների վերաբերյալ ուսումնասիրությունը։ Այս նախագիծը նշանավորում է աշխարհի ամենահարուստ գործարարի պաշտոնական վերադարձը ԱՄՆ նախագահ Դոնալդ Թրամփի վարչակազմին խորհրդատվություն տրամադրելու գործընթացին։
Մասկը նախկինում ղեկավարել է Կառավարության արդյունավետության վարչությունը և նախաձեռնել դաշնային մակարդակով աշխատակիցների կրճատման գործընթացները՝ նախքան 2025 թվականի մայիսին պաշտոնից հեռանալը։
Կուանտիկոյի ռազմակայանում «Մերիդիան» (Project Meridian) նախագիծը ներկայացնելիս ԱՄՆ ռազմական գերատեսչության ղեկավար Փիթ Հեգսեթն այս նախաձեռնությունը բնութագրեց որպես երկրի առաջատար մտքերի կողմից իրականացվող աշխատանք՝ ուղղված պատերազմական գործողությունների ապագայի ուսումնասիրմանը՝ «ամերիկյան առավելության յուրահատուկ աղբյուրի» կիրառման միջոցով, որին չեն տիրապետում ԱՄՆ-ի հակառակորդները։
Մասկը կղեկավարի նախագիծը՝ համագործակցելով Anduril Industries պաշտպանական ընկերության համահիմնադիր Փալմեր Լաքիի և Ներկայացուցիչների պալատի նախկին խոսնակ Նյուտ Գինգրիչի հետ։
Մասկի ընկերություններն արդեն իսկ Պենտագոնի առանցքային կապալառուների շարքում են։ Մասնավորապես, մինչ SpaceX-ը արբանյակային ցանցեր է ստեղծում Թրամփի «Ոսկե գմբեթ» (Golden Dome) հրթիռային պաշտպանության համակարգի համար, արհեստական բանականությամբ զբաղվող xAI ընկերությունը սույն թվականին համաձայնագիր է կնքել, որը զինվորականներին հնարավորություն է տալիս գաղտնի համակարգերում օգտագործել իր Grok չաթ-բոտը։
«Մերիդիան» նախագծի արդյունքները
Մասկն ու Թրամփը կարգավորել են հարաբերությունները՝ անցյալ տարի նախագահի ծախսերի մասին օրինագծի շուրջ ունեցած աղմկահարույց վեճից հետո։
Մասկը կրկին հաճախակի է հայտնվում Սպիտակ տանը։ Վերջերս նա արհեստական բանականության ոլորտի ղեկավարների հետ ճաշկերույթի ժամանակ նստել էր անմիջապես Թրամփի կողքին և ստորագրել արհեստական բանականության անվտանգության վերաբերյալ կառավարության նախաձեռնած համաձայնագիրը։
Մասկը նաև ներկա է գտնվել Թրամփի կազմակերպած պաշտոնական ընթրիքին՝ ի պատիվ Չինաստանի նախագահ Սի Ծինփինի, և, վերսկսելով հանրապետականների նախաձեռնություններին ուղղված խոշոր նվիրատվությունները, առնվազն 90 միլիոն դոլար է հատկացրել նոյեմբերին կայացած միջանկյալ ընտրություններին։
Հեգսեթը հայտարարեց, որ այս նախաձեռնությունը, որն իրականացվելու է նորարարության, ակադեմիական և քաղաքականության ոլորտներից մանրակրկիտ ընտրված մասնագետների ու մասնավոր հատվածի առաջատարների ներգրավմամբ, նպատակ ունի բացահայտել այն ոլորտները, որոնցում ԱՄՆ-ն պետք է մասնագիտանա, և այն կարողությունները, որոնք անհրաժեշտ է ձեռք բերել, ընդ որում՝ արդյունքները կհրապարակվեն 120 օրվա ընթացքում։
