Չորեքշաբթի օրը հայտարարություն կատարած ԱՄՆ օրենսդրի խոսքով՝ Թրամփի վարչակազմը հայտնել է, որ Մերձավոր Արևելքում ամերիկյան ավիակրի երկարատև տեղակայման ընթացքում ԱՄՆ զինվորականների շրջանում ինքնասպանության ութ փորձ է գրանցվել։
Այս տեղեկությունը հայտնի է դարձել Ռազմածովային ուժերի քարտուղարի պաշտոնակատար Հունգ Կաոյի՝ դեմոկրատ սենատոր Քիրսթեն Գիլիբրանդին ուղղված նամակից, որը գրվել էր ի պատասխան «USS Abraham Lincoln» նավի վրա տիրող պայմանների վերաբերյալ վերջինիս հարցումների։
Անցյալ տարվա նոյեմբերին նավի մարտական հերթապահության մեկնելուց ի վեր այնտեղ կենցաղային պայմանների վատթարացման և հոգեկան առողջության հետ կապված խնդիրների աճի մասին հաղորդումները լայն արձագանք էին գտել ԱՄՆ-ում և քննադատության տեղիք տվել Իրանի դեմ ամերիկյան ռազմական արշավի առնչությամբ։
Ռազմածովային ուժերի քարտուղարի՝ այդ կառույցի բարձրագույն քաղաքացիական պաշտոնյայի նամակում նշվում էր. ««Լինքոլն»-ի մարտական հերթապահության մեկնարկից ի վեր հարվածային խմբավորման կազմում գրանցվել է ինքնասպանության փորձի ընդհանուր առմամբ ութ դեպք»։
Մտահոգիչ իրավիճակ
Նամակում նաև լրացուցիչ մանրամասներ են ներկայացվել ինքնասպանության փորձերի վերաբերյալ։ Ըստ նամակի՝ ավիաթևին կցագրված նավաստիներից մեկը «օգոստոսի սկզբին ցատկել է նավից», սակայն որոնողափրկարարական ուղղաթիռն արագորեն փրկել է նրան և տարհանել նավից՝ հետագա զննման ու բուժօգնության նպատակով։
Մեկ այլ նավաստի «մարտին փորձել է ցատկել նավից, սակայն նավակիցները կանխել են նրա գործողությունը», ինչից հետո նա հետ է ուղարկվել մշտական տեղակայման վայր։
«Լինքոլն»-ը Կալիֆոռնիայից դուրս էր եկել 2025 թվականի նոյեմբերին՝ Հարավչինական ծովում առաքելություն իրականացնելու նպատակով, սակայն դրա ուղղությունը փոխվել էր դեպի Մերձավոր Արևելք՝ նախքան 2026 թվականի փետրվարի վերջին սկսված ԱՄՆ-ի և Իսրայելի համատեղ հարվածները։ Ծովում անցկացրած 286 օրից հետո նավը սեպտեմբերի սկզբին վերջապես կայանել էր Թաիլանդի նավահանգստում։
Օգոստոսին զինծառայողների ընտանիքներն ու օրենսդիրները մտահոգություն էին հայտնել ինքնասպանության փորձերի, հոգեկան առողջության հետ կապված այլ լուրջ խնդիրների, սննդի պակասի և ոչ պատշաճ սանիտարական պայմանների վերաբերյալ։
Այդ ժամանակ Թրամփը հերքել էր այդ պնդումները։ ԱՄՆ պաշտպանության նախարար Փիթ Հեգսեթը նույնպես հայտարարել էր, որ նավի վրա տիրող իրավիճակը «աղավաղված է ներկայացվել»։
