Ռուսաստանի ԱԳՆ պաշտոնական ներկայացուցիչ Մարիա Զախարովան Մեծ Բրիտանիային կոչ է արել վերանայել Ռուսաստան-Ուկրաինա պատերազմի վերաբերյալ իր դիրքորոշումը՝ նշելով, որ իրավիճակը պարունակում է հակամարտությունը բոլորովին նոր մակարդակի հասցնելու վտանգ։

Մարիա Զախարովան Մոսկվայում կայացած մամուլի ասուլիսում հայտարարել է, որ Մեծ Բրիտանիան և Ֆրանսիան «կրակի հետ են խաղում»՝ Ուկրաինային մատակարարելով բարձր ճշգրտության հրթիռային տեխնոլոգիաներ։

Երկուշաբթի օրը Միացյալ Թագավորությունը հայտարարեց, որ Կիևին հասանելիություն կտրամադրի գաղտնի տեխնոլոգիաների՝ հնարավորություն տալով տեղական արտադրության եղանակով թողարկել «Storm Shadow» հեռահար թևավոր հրթիռներ, որոնք ունակ են հարվածներ հասցնել Ռուսաստանի տարածքի խորքերում։

Մեծ Բրիտանիայի պաշտպանության նախարարությունը հայտարարել էր, որ «ուս ուսի տված կանգնած է Ուկրաինայի կողքին» և հանձնառու է տրամադրել այն սպառազինությունը, որն անհրաժեշտ է Ուկրաինային՝ «Ռուսաստանի նախագահ Վլադիմիր Պուտինի ապօրինի ներխուժումից» պաշտպանվելու համար։